Musikgesellschaft Vignogn

Igl onn 1920, ha sur Christoffel Willi surpriu l’emprema bitgetta dalla societad da musica da Vignogn, e quei cun 15 musicants. Suenter 6 onns ei il proxim pass vegnius fatgs, l’entrada ell’uniun cantunala da musica.
Entochen oz havein nus astgau menar atras fiastas per 3 instrumentaziuns e 3 uniformaziuns novas. Plinavon havein nus era giu la cuida da menar atras la 10 avla fiasta da musica Sursilvana igl onn 1969. Era havein nus giu 2 gadas l’honur da saver sepresentar ella televisiun, numnadamein igl onn 1978 per l’emissiun „Chum und lueg“ e 1990 per la „Svizra Romontscha“.
Nies giubileum da 75 onns ei staus per nus in eveniment tut special, havein nus gie schizun aunc astgau beneventar fundaturs da nossa musica. Cun grond plascher ed engaschi essan nus era separticipai a fiastas da musica cantunalas sco era a fiastas sursilvanas. Igl onn 1976 essan nus separticipai alla fiasta federala da musica a Biel e 2011 a S. Gagl.