Herzlich Willkommen

Männerchor Lumnezia

Il Chor viril Lumnezia ei vegnius fundaus 1938. Il niev chor ha tgirau vinavon l’ierta musicala dils anteriurs chors da vallada Ligia da Porclas (Lumnezia-su) fundada 1867 e dalla Ligia dil Glogn (Suraua) ch’era seseparada 1900 dalla Ligia da Porclas.
El decuors da sia historia ha il Chor viril Lumnezia tgirau cun gust e perseveronza la canzun tradiziunala romontscha ed interpretau oriundamein cunzun ovras da cumponists romontschs. Denton era ovras da cumponists da renum internaziunal figureschan regularmein sil program da concert da quei grond chor viril da vallada. El decuors dils davos decennis ha il chor denton era adina puspei ughegiau d’interpretar ovras pretensiusas da cumponists contemporans ed ei s’aviarts era per la litteratura musicala dad autras culturas. Ils concerts annuals e la participaziun a fiastas da cant districtualas, cantunalas e federalas fuorman ils puncts culminonts dall’activitad musicala dil chor.
Repetidamein ha il Chor viril Lumnezia era concertau ensemen cun chors e formaziuns muscialas dils vitgs dils quals el retrai ina gronda part da sia substanza musicala. Sco bien ambassadur dil lungatg e dalla cultura romontscha ha il Chor viril Lumnezia adina puspei giu la cuida da representar il Grischun e la Romontschia ad arranschaments cantunals e naziunals.
Igl onn 2013 ha il chor astgau festivar siu giubileum da 75 onns. A caschun da quei giubileum ei il chor sepresentaus culla premaudiziun da l’ovra „Canzuns lumnezianas“, in ciclus cumponius aposta pil chor giubilont dil cumponist indigen Gion Antoni Derungs cuort avon sia mort.
Il Chor viril Lumnezia ha registrau la platta fonografica „Lumnezia sonora“ (1973) ed ils discs cumpacts „Ei catscha gis“ (1997) en cooperaziun cul Chor facultativ dalla Scola secundara Lumnezia e „Viers mesanotg/Nordlichter“ (2008) ch’ei vegnius realisaus ensemen cul cantus firmus surselva. Sco dun da giubileum ha il Chor viril Lumnezia realisau igl onn 2013 ensemen cun Radiotelevisiun Svizra Rumantscha RTR il disc dubel „75 onns Chor viril Lumnezia“ che dat in tagl dètg representativ atraviers la historia musicala dil chor.
Dau tempra musicala al Chor viril Lumnezia han cunzun ils dirigents Murezi Elvedi (1938-1945), Gion Giusep Derungs (1945-1974), Armin Caduff (1974-1977), Marcus Zarn (1977-2004) e Clau Scherrer (2004-2015). Cugl onn da cant 2015/2016 ha Retus Giger surpriu la bitgetta.
Il Chor viril Lumnezia ha gidau a far punts enteifer ils vitgs lumnezians e ha promoviu essenzialmein schientscha ed identitad lumneziana. El decuors da sia historia ei il Chor viril Lumnezia denton buca daventaus mo in prominent portavusch dalla Val Lumnezia, anzi era in bien ambassadur da lungatg e cultura romontscha lunsch sur sias scheinas romontschas e grischunas ora.